Gëzim Krasniqi vendosi të rikthehej në kampionatin shqiptar pas një përvojë 5-mujore tek Rabotnicki në Maqedoni. Mbrojtësi i është bashkuar Kukësit dhe mundësia për të fituar për herë të parë titullin kampion, shërbeu si motivim kryesor për të pranuar ofertën e drejtuesve verilindorë.
“Të jem i sinqertë, kanë qenë objektivat që klubi i Kukësit ka shfaqur sezonet e fundit, që më kanë bindur t’i bashkohem kësaj skuadre. Dëshira për të fituar titullin është e madhe dhe për këtë arsye kam ardhur te Kukësi. Skuadrat në Superiore nuk kanë ndonjë diferencë të madhe, ndaj besoj se Kukësi do të bëjë diferencën”, u shpreh Krasniqi.
Të dielën Kukësi do të sfidojë në transfertë Flamurtarin. Paraqitja e vlonjatëve ndaj Teutën në javën e parë nuk i ka lënë përshtypje pozitive Krasniqit, i cili gjithsesi vlerëson skuadrën kuqezi
“Ndoqa të dielën ndeshjen mes Teutës dhe Flamurtarit dhe vlonjatët mu dukën shumë dobët, ndërsa Teuta më befasoi. Megjithatë ne duhet ta vlerësojmë shumë, që të arrijmë një rezultat pozitiv”, tha mbrojtësi i verilindorëve.
Nuk mund të mungonte një koment për Partizanin pas 5 viteve të kaluara tek “Demat”, një koment që nuk i vendos 10 me yll skuadrës së kuqe.
“Kur isha unë, ishte tjetër atmosferë, por tani nuk më ngroh Partizani aspak. Nuk më duket se kanë bërë diçka serioze, pasi kanë ndryshuar thuajse 90 % të skuadrës. Nëse ndryshon skuadrën çdo sezon, është e vështirë të bësh hajër”, deklaroi Gëzim Krasniqi.
