Shtetasi italian që u kap mbrëmjen e së mërkurës në portin e Durrësit në tentativë për të trafikuar marijuanë drejt Italisë do të qëndrojë në paraburgim për 30 ditë.
Gjykata e Krimeve të Rënda dha sot masën e sigurisë për 60-vjeçarin, Piero Mormina, që u kap me 6 kg marijuanë në mjetin e tij tip “Fiat”.
Prokurori Dritan Prençi kërkoi ‘arrest me burg’ për akuzën ‘Trafik të lëndëve narkotike’, ndërsa avokati i të akuzuarit kërkoi masë me afat për klientin e tij deri ne daljen e ekspertizes kimike te lendes së dyshuar si marijuanë.
Vetë Piero Mormina i kërkoi gjykates të shmangë burgun për shkak te gjendjes shëndetësore.
Para trupës gjykuese ai ka mohuar të ketë pasur dijeni për lëndën narkotike që u gjet e fshehur poshtë prapakolpit të makinës në të cilën udhëtonte.
Sipas tij, ai kishte bërë biznes me një shkodran për transportuar një pako me pasaporta false.
Piero Mormina: Nuk kisha dijeni për drogën, kam ardhur në Shqipëri më 7 gusht dhe kam qëndruar në Shkodër. Atje kam takuar një person që më ka dhënë 1 mijë euro për të transportuar një pako me pasaporta false.E kam mësuar në portin e Durrësit që ishte lëndë narkotike. Nuk e njoh personin qe me futi pakon ne mjet.
