Rezulton se Zykaj e ka kryer aktin makabër për motive banale, vetëm se dy nga kushurinjtë e tij e kishin akuzuar për vjedhjen e disa pulave. Të paktën kjo është ajo çka mësohet nga informacionet e deritanishme pas kapjes së tij nga policia mëngjesin e sotëm.
‘Unë i vrava, më gjeni avokat se nuk dua të më vrisni. Viktimat më akuzonin për çdo gjë, unë s’kam vjedhur asnjë pulë. Edhe ju më akuzoni për çdo gjë’, është shprehur ai. Pas arrestimit ai është mbajtur në komisariat teksa u pyet fillimisht për motivin e vrasjes. Ai mësohet të ketë thënë vetëm se të gjithë e akuzonin për çdogjë duke e detyruar ti vrasë më vonë.
Informacioni i plotë nga policia pas marrjes në pyetje
Në lidhje me ngjarjen e rëndë të ndodhur mbasditen e datës 10.08.2018, ku u vranë me armë zjarri 8 pjestarë të dy familjeve ju informojme se:
Grupi hetimor me ekspertë të Policisë Kriminale të DVP Vlorë dhe të Departamentit të Policisë Kriminale në bashkëpunim me Prokurorinë e Rrethit Gjyqësor Vlorë, po vijojnë hetimet lidhur me motivin e plotë të krimit të kryer prej 24 vjeçarit në fshatin Resulaj.
Që prej momentit që u shoqërua në ambjentet e DVP Vlorë, autori po pyetet në disa seanca nga strukturat policore përkatëse mbi rrethanat e krimit.
Nga hetimet e deri tanishme dhe nga deklarimet paraprake të shprehura prej tij, ka rezultuar se e ka kryer aktin kriminal për motive të dobëta/banale, (autori është shprehur se pjestarë nga dy familjet Zykaj e kanë akuzuar për vjedhje).
Lidhur mbi këtë por edhe në pista të tjera Policia po vijon hetime të imtësishme deri në zbardhjen e plotë të rrethanave të ngjarjes.
