Nuk kanë fund zhvillimet në merkato gjatë kësaj vere. Barcelona pas transferimit të Arturo Vidal, është gati që të marrë një tjetër mesfushor me shumë peshë, për të bërë që të harrohet largimi i Iniestës. Bëhet fjalë për Paul Pogba, duke synuar rikrijimin e ish-dyshes fantastike në mesfushën e Juventusit.
Klubi katalanas do të shfrytëzojë marrëdhëniet e tensionuara mes lojtarit francez dhe Jose Mourinhos. Të dy nuk kanë ndonjë simpati për njëri-tjetrin, gjë që është vënë re dhe në fushë. Madje Mourinho ka mbetur i zhgënjyer që francezi nuk sakrifikoi ndonjë nga ditët e pushimeve, për t’u bashkuar me grupin në Amerikë.
Kjo tratativë do të varet shumë edhe nga Manchester United, nëse do të jetë e gatshme për ta shitur kampionin e botës. Transferimi do të varet edhe nga agjenti Mino Raiola, i cili ka marrëdhënie të shkëlqyra me disa nga drejtuesit e Barçës, duke përfshirë ish-mbrojtësin Eric Abidal.
Sipas vetë italianit, ëndrra e Pogbasë ka qenë gjithmonë për të luajtur me Barcelonën dhe Leo Messin, duke theksuar se gjithsesi, kjo tratativë do të ishte e ndërlikuar. United pagoi 110 milionë euro për Pogba, dy vite më parë dhe vështirë se do të pranonte një çmim më të ulët.
