Është lojtari më i shtrenjtë në botë për momentin por duket se ka edhe një talent tjetër, atë të lojtarit të Pokerit. Ylli brazilian Neymar po kalon verën në vendlindje dhe ka gjetur kohë të marrë pjesë në turneun më të madh të pokerit në Sao Paulo, ku nga 288 lojtarë ka arritur të renditet i gjashti. Do të ketë simuluar edhe këtu…?!
Edhe pse nuk luan me Paris SG që prej muajit shkurt dhe shfaqi probleme fizike gjatë pesë ndeshjeve që Brazili zhvilloi në Botëror, Neymar tërhoqi më shumë interes për shtrirjet në fushë gjatë turneut rus, duke simuluar pas çdo ndërhyrje të kundërshtarëve.
Por edhe pse nuk ka dalë i pari, por i gjashti, Neymar ka arritur të sigurojë plot 20 mijë Euro nga ky turne, një shifër modeste krahasuar me pagën e tij disa dhjetra milionëshe që merr te klubi francez. “Jam shumë i lumtur që marr pjesë në një turne të tillë për herë të parë dhe që arrij deri në finale”, tha Neymar. “Ishte një eksperiencë e re por fantastike”.
