Është shtuar sërish numri i shqiptarëve të lënduar nga zjarri “përbindësh” që shkrumboi zonën e Rafinës në Athinë dhe që shkaktoi rreth 80 viktima e afro 200 të plagosur. Sipas njoftimit më të fundit të ambasadës janë 6 bashkëkombës të plagosur.
Ambasada më herët kishte njoftuar më herët gjatë të mërkurës se një shqiptar që i përket minoritetet grek gjendet gjendje të rëndë në spitalin Evangelismos, ndërsa gjatë ditës së djeshme u raportua për tre të plagosur, që janë një grua nga Berati dhe dy fëmijë nga Fieri nga e njëjta familje, 10 dhe 13 vjeç.
Në njoftimin e apdejtuar në mesditë, Ambasada sqaron se nga konstatimet në zonat e prekura nga zjarri të përfaqësuese të saj, është mësuar se në zonën e Matit janë plagosur lehtë dy shqiptarë, të cilët ndodhen në gjendje të mirë shëndetësore.
“Përsa i përket pjesës tjetër të komunitetit raportohet se janë djegur banesat ku jetonin disa prej tyre, si dhe disa automjete personale. Banorët e prekur janë transferuar përkohësisht në një kamp pushimi të zonës i cili është kthyer në strehë banimi të përkohshme”, thuhet në njoftimin e Ambasadës.
Për zonat e tjera të prekura më së shumti nga zjarri, si Kokkino Limanaki dhe Ano Voutsa, Ambasada vazhdon të jetë në kontakt të drejtpërdrejtë me autoritetet greke për të marrë informacione në vijim.
Ambasada thekson se vijon të ndjek nga afër situatën duke komunikuar me qytetarë, anëtarë të komunitetit në zonat e prekura të rajonit të Atikës, si dhe me autoritetet kompetente të emergjencës së qeverisë greke.
