Presidenti iranian, Hassan Rouhani, ka paralajmëruar të dielën Uashingtonin kundër veprimeve agresive që mund të çonin në luftë me Iranin.
Udhëheqja iraniane, me sa duket, po ndjen erë lufte me një armiqësi në rritje me Shtete e Bashkuara pas tërheqjes së Donald Trump nga pakti ndërkombëtar nuklear, me mbështetjen e fuqishme që SHBA po i jep së fundmi Izraelit, përfshirë njohjen e Jerusalemit si kryeqytet i tij, një vendim i kundërshtuar nga të gjithë vendet me shumicë myslimane në atë rajon, përfshirë Iranin e deklaruar armiqësor me Izraelin dhe kërcënimet për “zhdukje” dhe protestat ndonjëherë masive që kanë nisur në Iran, të cilat janë mbështetur nga zyrtarët në Uashington.
“Amerika duhet ta dijë se paqja me Iranin është nëna e çdo paqeje dhe lufta me Iranin është nëna e të gjitha luftërave”, i ka thënë Rouhani një grupi diplomatësh iranianë, sipas “Reuters”. Presidenti Rouhani tha gjithashtu se ndjekja e politikave armiqësore kundër Iranit do të çonte vetëm në keqardhje. “Ju nuk jeni në gjendje të nxisni kombin iranian kundër sigurisë dhe interesave të Iranit”, shtoi Rouhani, sipas raportimit të “Reuters”.
Tensionet e larta mes SHBA dhe Iranit datojnë prej shumë vitesh, shumë para administratës së Donald Trump, por Presidenti Trump ka shqetësuar aleatët dhe Iranin me vendimin e tij për tërheqjen e SHBA-ve nga marrëveshja bërthamore e Iranit, më parë këtë vit.
Si rezultat, SHBA do të vendosë sanksionet ndaj kompanive që bëjnë biznes me Iranin, megjithëse Departamenti i Thesarit ka thënë se mund të japë lehtësime për disa biznese.
Trump ka thënë se Irani duhet të kthehet në tryezën e negociatave për të arritur një marrëveshje më të mirë nukleare, pasi e ka quajtur marrëveshjen e arritur gjatë administratës së ish-Presidentit Barack Obama me administrata të vendeve të tjera të fuqishme të botës plus Iranin, si një nga marrëveshjet më të këqija që ai ka parë ndonjëherë.
Por “New York Times” ka raportuar javën e kaluar se udhëheqja iraniane e ka refuzuar në shumë raste në vitin 2017 kërkesën e Trump për t’u takuar personalisht.
