Një ceremoni e rivarrimit të eshtrave të 100 ushtarëve grekë, të vrarë gjatë luftës italo-greke në Shqipëri, zhvillua pa shumë bujë gjatë fundjavës në Bularat të Dropullit.
Ceremonisë i parapriu mesha, ku morën pjesë përfaqësues të Ministrisë së Brendshme dhe asaj të Punëve të Jashtme të Athinës, si dhe ambasadorja e Greqisë në Tiranë, Eleni Sourani. Ceremoninë e zhvilluar në Dropull e ndoqi edhe kreu i PBDNJ-së, Vangjel Dule.
Kjo është ceremonia e parë e rivarrimit të eshtrave të të rënëve grekë, në Murin Memorial të Ushtarëve të Panjohur në Bularat. Komisioni shqiptaro-grek ka njoftuar se ceremoni të tjera rivarrimi do të vijojnë përgjatë verës.
Ajo që bie në sy është se shumica e ushtarëve, eshtrat e të cilëve u nxorën prej gërmimeve në Dragot, nuk kanë identitet. Ambasadorja e Greqisë në Shqipëri u bëri thirrje familjarëve të dorëzojnë ADN-në e tyre, në mënyrë që të bëhet identifikimi i eshtrave.
Ndërkohë, kryetari i Shoqatës së të afërmve të të rënëve gjatë luftës italo-greke, Jorgo Sourlas ka deklaruar për mediet e Athinës se, familjet që përfaqëson janë ndierë të ofenduara, pasi sipas tij nuk janë ftuar të marrin pjesë në këtë ceremoni, të cilën e prisnin prej dhjetëra vitesh.
