Një dukuri e pazakontë ka ndodhur sot me Postën Shqiptare, ku në të gjitha filialet e saj është ndërprerë interneti.
Shkëputja e linjës së internetit ka bërë që sistemi i Postës të mos funksionojë dhe për rrjedhojë mijëra qytetarë, ndër ta edhe pensionistë, të presin për orë të tëra për të marrë shërbime pranë Postës. Janë jo të paktë qytetarët të cilët marrin apo kryejnë dërgesa jashtë vendit përmes Postës, por më akute është ajo për pensionistët.
Në temperatura të larta, të moshuarve u duhet të qëndrojnë pas sporteve të Postës, në pritje të rilidhjes së internetit. Administrata e Postës Shqiptare nuk jep asnjë shpjegim për këtë “black out”, ndërsa nuk ka pasur asnjë njoftim paraprak për këtë situatë të pazakontë.
