Presidenti i Real Madrid Florentino Perez raportohet të ketë ruajtur fanellën me numër 7 që ka Ronaldo për një tjetër “Galactico”: Eden Hazard. Por së fundmi Barcelona është futur në garë për belgun dhe kjo mund të prishë planet e numri 1 të “Bernabeu”-t.
Sipas lajmeve që qarkullojnë sot në mediet spanjolle edhe ato britanike Roman Abramovich i ka hapur dyert për largimin e belgut, që po bën një paraqitje fantastike në Kupën e Botës. Dhe pavarësisht interesimit të madh të Realit, Barcelona ka bërë gati një ofertë konkrete dhe me shumë gjasa do ta paraqesë te manjati rus në ditët në vazhdim.
Hazardit i kanë mbetur edhe dy vjet në kontratën që ka nënshkruar me blutë e Londrës dhe sipas “Sport” është vetë 27-vjeçari që ka shprehur dëshirën për t’u larguar në kërkim të një aventure të re. Fakti që Chelsea nuk arriti të kualifikohej për në Champions League për këtë sezon ka luajtur një rol vendimtar në këtë vendim, pasi Hazard nuk dëshiron të mungojë në një kompeticion kaq të rëndësishëm.
Por “Mundo Deportivo” shkruan në numrin e sotëm se kalimi i Hazard te Barcelona mund të ndodhë vetëm nëse në krye të skuadrës qëndron Antonio Conte. Pasi në rast se Abramovich i jep drejtimin e skuadrës Maurizio Sarrit, ish-trajneri i Napolit i ka bërë të qartë se belgu, por edhe Willian (një tjetër objektiv i Barcelonës) janë të paprekshëm. i vetmi lojtar të cilin Sarri do të ishte i gatshëm të shiste duket se është N’Golo Kante, për të cilin është interesuar së fundmi Paris SG.
