Një aksident i rëndë i mori jetën 5 personave të një familje të dielën në Kosovë. Aksidenti ndodhi në aksin rrugor Suharekë-Duhël, ndërsa vëllai i 25-vjeçares A.S. që humbi jetën bashkë me bashkëshortin, dy fëmijët dhe vjehrrën ka rrëfyer ngjarjen tragjike në një intervistë për median zviceran 20min.ch.
Ylli V., i cili është vëllai i madh i 25-vjeçares që ndërroi jetë në aksidenti shprehet se ende nuk mund ta besojë ndarjen nga jeta të motrës së tij dhe nipit e mbesës.
“Rreth gjysmë ore para se të ndodhte aksidenti ne ishim ulur dhe po qëndronim bashkë. “J.S, si gjithmonë bënte shaka. Në ditët e ardhshme ne kishim planifikuar që të shkonim në bregdetin shqiptar ku do të festonim edhe ditëlindjen e motrës sime”.
25-vjeçarja që ndërroi jetë të dielën, kishte ardhur në Kosovë bashkë me familjen e tij të premten.
Ylli V. tregon se ai bashkë me familjen e tij u nisën drejt Shqipërisë, ndërsa familja prej katër anëtarësh dhe gjyshja e tyre po shkonin tek vëllai i 32-vjeçarit, J.S.
“Ata donin të vinin të mërkurën në Shqipëri. Unë duhej t’ua rezervoja hotelin atyre”, thotë Ylli V. Më tej ai rrëfen se si e mori vesh për aksidentin.
Familja katër anëtarëshe jetonte prej vitesh në qytetin Reinach të kantonit të Aargau në Zvicër. Ata ndodheshin me pushime në Kosovë.
