Lucas Marcos Meireles nuk do të jetë pjesë e skuadrës së Gjilanit dhe nuk jepen arsyet e ndërprerjes së këtij bashkëpunimi. Para pesë ditësh, konkretisht më 5 korrik, klubi që garon në Vala Superliga e Kosovës prezantoi sulmuesin brazilian dhe mbrojtësin e djathtë Endrien Magani, por tashmë ka një njoftim të dytë, ku bën me dije se me ish-lojtarin e Renovës është ndërprerë bashkëpunimi me marrëveshje.
“Klubi i Gjilanit njofton se me mirëkuptim të dyanshëm ka shkëputur marrëveshjen me lojtarin e ardhur brazilian, Lucas Marcos Meireles. SC Gjilani e falënderon futbollistin për gatishmërinë dhe i uron suksese në të ardhmen”, shkruhet në njoftimin e klubit gjilanas. Një ngjarje e paprecedentë për klube normale futbollit, por është “alla shqiptare” duhet thënë, pasi ndodh shpesh diçka e tillë, si në Republikën e Shqipërisë, si përtej kufirit, në Kosovë. Nuk është aspak normale që të firmoset me një lojtar dhe brenda pak ditësh të anulosh kontratën dhe shpresohet që kjo mënyrë funksionimi e klubeve të ndryshojë njëherë e përgjithmonë.
Meireles kishte provuar të luante në elitën e futbollit në Maqedoni. Sulmuesi 22-vjeçar sezonin e fundit ishte aktivizuar në 18 ndeshje (12 titullar) me Renovën dhe numëron tre gola të realizuar në kampionat. Më parë ka qenë edhe pjesë e Makedonija GJP, ku ka luajtur më pak dhe nuk ka mundur do të shënojë. Braziliani tentoi të provonte një eksperiencë në Kosovë, por nuk do të ndodhë kështu. Gjilani këtë verë ka bërë disa lëvizje në merkato, teksa nga Superiorja ka marrë lojtarë si Ansi Nika, Brunild Pepa dhe Endrien Magani.
