Teksa ishte e ftuar në emisionin “Nin”, këngëtarja Shyhrete Behluli ka rrëfyer një histori interesante nga martesa e saj në vitin 1981.
Ajo ka kënduar që në moshën 16-vjeçare. E duke qenë se gjatë asaj kohe ka kënduar gjithmonë këngë patriotike, të gjithë mendonin se Shyhreten e kishte vrarë regjimi serb pas protestave të vitit ’81.
Por ajo tregon se ishte martuar po në të njëjtin vit në Podujevë dhe lajmi i martesës së saj kishte bërë bujë të madhe. Askush nuk e kishte besuar se ajo ishte gjallë dhe shumë njerëz ishin mbledhur për ta parë e për të vërtetuar nëse ishte ajo, apo dikush tjetër.
“Kur jam martuar, njerëzit prej kureshtjes kanë ardhur për të më parë. Dy anët e rrugës, që ndoshta kanë qenë një kilometër prej shtëpisë, ishin mbushur me njerëz. Kishin ardhur prej fshatrave përreth, me traktorë, me çfarë kanë mundur, për të më parë mua. Kur kam ardhur në oborr nuk mundja të dilja, të kaloja tek shkallët. Nuk mundesha prej grave sepse s’të linin të hapje derën”, ka rrëfyer Shyhretja.
