Sokol Cikalleshi me shumë mundësi do të vazhdojë të jetë pjesë e Super Ligës turke. Sulmuesi i kombëtares shqiptare, është nën shënjestrën e Goztepes, siç raportojnë vetë mediat turke.
Klubi nga rrethinat e Izmirit është në kërkim të një sulmuesi pas largimit të Demba Ba dhe pjesë e listës së drejtuesve është edhe 27-vjeçari kavajas. Por, interesant është fakti se në listën e dëshirave të Goztepes është edhe sulmuesi me famë botërore, Samuel Eto’o, si dhe uruguaiani Abel Hernandez.
Sezonin e kaluar, Cikalleshi u aktivizua me Osmanlisporin, teksa shënoi edhe 6 gola në kampionat, por klubi nga Ankaraja u rrëzua një kategori më poshtë. Gjithsesi, tashmë Cikalleshi shpreson që të vazhdojë të jetë pjesë e elitës së futbollit turk.
