Argjentina u eliminua nga Kupa e Botës në 1/8 dhe largimi i “Albiceleste” nga Botërori nuk ishte një surprizë, pasi ata për asnjë moment nuk e treguan veten. Trajneri Jorge Sampaoli deklaroi se skuadra e tij bëri gjithçka për të kaluar më tej, ndërsa zbuloi se nuk do të vendosë sot për të ardhmen e tij. “Është shumë e dhimbshme, veçanërisht për shkak se lojtarët kanë bërë një përpjekje shumë të madhe. Ishte një ndeshje shumë e vështirë, por ne nuk e kemi arritur qëllimin tonë këtu në Rusi. Jam i mërzitur, i frustruar dhe mendoj se është shumë normale. Për mua fakti që jam këtu tregon që jam i zoti. Unë nuk do ta vendos sot të ardhmen time”, u shpreh në konferencën për shtyp Sampaoli.
“Mendoj se ne u përshtatëm me rrethanat, në vend që të kishim një ide më të qartë. Ne ishim të sigurt që duhet të fitonim dhe ky ishte qëllimi ynë kryesor. Ndoshta kjo ishte pika jonë më e fortë se koncepti ynë për futbollin. Ne kishim lojtarin më të mirë në botë dhe duhej të krijonim situata kolektive që ai futbollist të kishte momente brilante”, vazhdoi ai. Më pas 58-vjeçari shpjegoi se e vuri skuadrën në dispozicion të sulmuesit të Barcelonës: “Ne provuam shumë taktika të ndryshme, e rrethuam atë, krijuam hapësirë për Messi-n, kështu që ne u përpoqëm të përdorim gjithçka që kishim për ta lejuar atë të bënte atë që mund të bënte. Ndonjëherë e menaxhuam situatën, ndonjëherë nuk e bëmë. Lojtarët luftuan deri në fund të ndeshjes dhe ata pothuajse barazuan në fund dhe kjo është ajo që unë me të vërtetë vlerësoj. Ata punuan shumë dhe unë dua t’u them faleminderit”, shtoi Sampaoli, që është kritikuar shumë gjatë kësaj periudhe ndërsa tani mediat sigurojnë se nuk e bën ai formacionin te Argjentina, por Messi.
