Deputeti i kuvendit serb, Slavisha Ristiç, i ka dërguar letër presidentit rus Vladimir Putin, në të cilën e kërcënon me vrasje presidentin serb, Aleksandar Vuçiç, nëse tenton të arrijë paqe dhe të nënshkruajë marrëveshje me Kosovën.
Ristiç kujton në letër se serbët “në historinë e marrëdhënieve serbo-ruse, gjithmonë u janë ankuar sundimtarëve rusë për shumë armiq të serbëve” dhe shton se ata tani për herë të parë këtë duhet ta bëjnë për shkak të pushtetarëve serbë.
Ai tregon se Presidenti i Republikës së Serbisë po përgatitet ta nënshkruajë marrëveshjen gjithëpërfshirëse me Prishtinën dhe e paralajmëron Vuçiçin për “fatin tragjik të kryeministrit të ndjerë të Serbisë Zoran Gjingjiç”, e që ky fat mund ta gjejë edhe atë.
“Gati të gjitha mediat të cilat e përkrahin regjimin në Serbi e theksojnë dashurinë e Aleksandar Vuçiçit ndaj Rusisë”, thotë Ristiç në letrën dërguar Putinit, të cilën e kanë transmetuar disa portale serbe, dhe pretendon se “Vuçiçi krenohet me atë se deri tani është takuar 13 herë me Putinin”.
Ristiç pranon se “misioni i Putinit te pushteti aktual në Beograd ka qenë delikat”, por megjithatë i bën thirrje që t’iu sqarojë se “kurrfarë euro-integrimesh nuk mund ta kompensojnë humbjen e territorit, siç është Kosova dhe senëse megjithatë vjen deri te kjo marrëveshje mbi normalizimin e marrëdhënieve, Putin të mos e përkrahë një zgjidhje të tillë”.
