Me këtë titull është hapur e përditshmja më e madhe holandeze De Telegraaf një ditë pas sulmit të zyrave qendrore të saj. Ndërkohë në kopertinë shfaqet furgoni i bardhë që goditi fasadën e xhamit të ndërtesës në periferi të Amsterdamit.
Ngjarja ndodhi rreth orës 04:00 të mëngjesit së të martës. Fatmirësisht nuk pati të lënduar por shpejt u bë e qartë se ky ishte një sulm i qëllimshëm, me shumë gjasa një paralajmërim për gazetën për të bërë pas.
“Është e qartë se ne nuk kemi miq kudo. Do të duhet të presim dhe të shohim se çfarë do të tregojë hetimi i policisë, por ne do të vazhdojmë punën tonë “, tha kryeredaktori I gazetës Paul Jansen.
Sulmi pasoi bombardimin e ndërtesës së botuesit Pijper Media, i cili publikon ndër të tjera revistën e krimit Panorama. Policia i sheh të dy sulmet një reagim ndaj botimeve të kohëve të fundit mbi krimin e organizuar.
Panorama dhe De Telegraaf kanë publikuar javën e kaluar shkrime për bastisjen policore të banesave të dy udhëheqësve të të ashtuquajturës “Mocro-mafia “, Ridouan Taghi dhe Saïd Razzouki. Dy të kërkuarit, sipas policisë dhe gjyqësorit, qëndrojnë pas disa vrasjeve te ndodhura ne vend.
