Kjo nuk është një thirrje e panjohur për banorët e Tiranës, e sidomos për lagjet ku uji është i kufizuar në orar.
Furgonët që sjellin ujë të pijshëm, i shikon të lëvizisin lirshëm në rrugët e kryqytetit edhe pse në muajin Maj Ujësjellësi Tiranë vendosi penalitete për subjektet që nuk zbatojnë kushtet higjieno-sanitare. Ata i shikon përgjatë gjithë rrugës që të çon drejt Dajtit ku janë të përqëndruara edhe burimet e ujit.
Marrja e licencës u jepet vetëm atyre subjekteve që kanë pajiset e duhura për të bërë shpërndarjen e ujit. Konkretisht çisternën prej inoksi dhe çezmat për rrjedhjen e ujit.
Pas një vëzhgimi të bërë në depon e UKT ku këto automjete furnizohen, duket se rregullat e lojës nuk janë të njëta për të gjithë, përveçse në dhënien e pagesës ndaj institucionit.
Krahas atyre që respektojnë kushtet e vëna për tregtim, uji transportohet edhe me mjete private të cilat nuk kanë asnjë logo apo identifikim se çfarë kanë brenda.
