Ndalohet një tjetër ish-zyrtar i Bashkisë së Rrogozhinës i dyshuar si përfshirë në skemën e tjetërsimit të pronave në bregdetin e Spillesë.
Ai është ish-kryeinspektori i bashkisë, Artur Tosku, i cili akuzohet për shpërdorim detyre. Tosku ishte shpallur në kërkim nga policia që prej fillimit të këtij viti, kur u godit grupi kriminal i abuzimit me pronën publike.
“Është kapur 1 shtetas i shpallur në kërkim, për të cilin Gjykata e Rrethit Gjyqësor Kavajë, ka vendosur masën e sigurimit ‘Arrestit me burg’, për veprën penale të ‘Shpërdorimit të detyrës’”, njoftoi Policia. Në atë kohë, policia vuri në pranga disa zyrtarë, të cilët në bashkëpunim me njëri-tjetrin, akuzohen se duke abuzuar me detyrën kanë falsifikuar dokumentet, duke bërë ndryshim e zërit kadastral për një siperfaqe prej 110.000 m2 tokë në vijën bregdetare Spille Kavajë dhe në fshatrat përreth, duke e tjetërsuar nga “tokë pa frut” në “tokë arë” dhe më pas kanë bërë ndarjen në mënyrë të kundraligjshme të kësaj sipërfaqe toke, në interes të tyre dhe personave të tjerë.
