Argjentina do të ndeshet mbrëmjen e sotme me Nigerinë në një ndeshje që do të jetë për jetë a vdekje. Nëse nuk mposht afrikanët, nuk do ta kalojë dot grupin dhe aventura ruse do të kthehet në një dramë të vërtetë sportive për amerikanojugorët.
Në këto raste mundohesh të bësh gjithçka është e mundur për të arritur rezultatin e shpresuar. Madje, në disa raste, i beson edhe magjisë. Por magjistari “Brujo” Manuel, që ka ndihmuar me fuqitë e tij të mbinatyrshme Argjentinën të kualifikohet në Botëror, ka bërë të ditur se nuk ka dëshirë të shkojë në Rusi.
“Seleçion po luante keq dhe Messi nuk po shënonte. Kam shkuar unë dhe kam zhbllokuar situatën, me Messi-n që ka shënuar tre gola (në ndeshjen e fundit të fazës kualifikuese kundër Ekuadorit)”, ka thënë magjistari, i cili ka shtuar. “Ajo energji negative ka ardhur nga një premtim i pa mbajtur nga kombëtarja shumë vite më parë”.
Vetë presidenti i federatës, Claudio Tapia, ka rrëfyer se puna e magjistarit ka “ndikuar” në fitoren e marrë nga bardhekaltrit kundër Ekuadorit. Sot, shumë tifozë të Argjentinë, por edhe disa lojtarë të kombëtares, kanë kërkuar që ai të shkojë në Rusi. Një kërkesë kjo që nuk do të plotësohet, sepse “Brujo” nuk është në gjendje të shkojë atje.
“Magjistari duhet të vijë, sepse po ndodhin shumë gjëra të çuditshme në Rusi. Na duhet energjia e tij pozitive dhe fuqitë e tij”, kanë thënë disa tifozë të Argjentinës. Por duket se edhe ai e ka braktisur Jorge Sampaoli-n. Një shenjë e fatit? Do ta shohim sot në mbrëmje.
