Nga Boldnews.al
Ish-ministri i Brendshëm Saimir Tahiri nuk kënaqet vetëm me lirinë mjaft të dyshimtë që i dha Gjykata e Apelit, duke e liruar nga masa e sigurisë, por kërkon sërish të jetë protagonist në publik, e madje sfidues ndaj drejtësië dhe politikës. Jo rastësisht ka publikuar disa foto i hipur në kalë buzë detit, që më shumë se relaksin që çdokush do e dëshironte, Tahiri kërkon me imponim sfidën.
“Vrapuam… Në fund më puthi… Rrugës për Itali…”. Ky është komenti i Tahirit që i vendos “diçiturën” tre fotove të shkrehura nga miqtë e tij, ku shfaqet majë kalit duke vrapuar, më pas i përqafuar me kalin dhe në foton e tretë përmbyllëse shkrun se është rrugës për në Itali.
Padyshim kjo mënyrë kujtimi e Tahirit që zuri vemendjen e portaleve dhe mediave në kulmin e botërorit të futbollit, qëllon më larg nga sa duket. Ish-ministri i Brendshëm ka fituar një betejë jo pak të rëndësishme, ku nga një vendim i dyshimtë për korrupsion dhe nën presion të gjykatës, arriti të dalë nga masa “arrest shtëpie” dhe të jetë krejtësisht i lirë, në pritje të vendimit përfundimtar që do të merret për të.
Ai e di mjaft mirë se liria e “dhuruar” një ditë mund të kërkojë haraçin e vet dhe kjo mbetet në duart e Edi Ramës. Ishte kryeministri ai që e shpëtoi nga arrestimi në tetor të vitit të kaluar, ishte po Rama që bëri sikur e “lëshoi”, duke e detyruar të jepte dorëheqjen nga mandati i deputetit, pasi në atë momente po diskutohej gjithnjë e më shumë mbi hapjen ose jo të negociatave të Shqipërisë me BE-në.
Ndaj Tahirit janë katër akuza të ngritura nga Prokuroria e Krimeve të Rënda, ku ndër më kryesoret janë trafik ndërkombëtar i narkotikëve në kuadër të grupit të strukturuar kriminal dhe korrupsion pasiv të zyrtarëve të lartë. Ish-numri një i Ministrisë së Brendshme është lexues i mirë i aktualitetit politik dhe vëmendja nuk është më ndaj tij, sepse për shumëkënd mund të konsiderohet gabimisht si “kalë i ngordhur”. Shigjetat kanë tjetër drejtim dhe ai është ministri aktual i Brendshëm Fatmir Xhafaj, dikur mik në të njëjtën parti dhe sot “armiqë të betuar” brenda llojit.
Kujtdo Tahiri mund ti bëjë karshillëk majë kalit, si opozitës, prokurorisë, gjykatës, apo rivalëve brenda PS-së, por ish-ministri, kryeministrin Rama nuk mund ta injorojë, të keqen dhe të mirën e pati pikërisht prej tij… Me një prokurori tërësisht të kontrolluar nga Rama dhe me gjykatë të frikësuar nga vettingu, kryeministri e ka të lehtë të japë verdiktet e tij për këdo, ndaj Tahiri duket se kalit i hipi së prapthi, frerët e të cilit mbesin në duart e kreut të qeverisë, sepse nëse ja do puna edhe për imazh, Rama nuk e ka problem ta “surgjinosë” ish-bashkëpunëtorin e tij të ngushtë.
