Ministri zviceran i Sportit Guy Parmelin iu gëzua fitores së kombëtares kundër Serbisë në botëror. Përveç suksesit, ajo që solli shumë polemika është festimi i dy autorëve të golave, Granit Xhakës dhe Xherdan Shaqirit që bën shqiponjën.
Por ministri zviceran reagoi me mirëkuptim ndaj gjestit me shqiponjë të lojtarëve shqiptarë. “Kush e ka përjetuar atmosferën e ndezur në stadium, e vlerëson edhe më shumë angazhimin e shkëlqyeshëm të kombëtares së Zvicrës dhe mund të kuptojë nëse kur ndonjë lojtar përfshihet nga emocionet. Nuk është qëllim i sportit që nga emocionet të krijohet një polemikë. Jemi një vend me shumë gjuhë, kultura dhe mendime dhe jetojmë në paqe së bashku. Jemi krenar me këtë kolorit. Ai e bën vendin tonë të fuqishëm. Edhe në sport”, deklaroi Parmelin. Duhet thënë se ai është anëtar i Partisë Popullore të Zvicrës (SVP), e cila mban qëndrime mjaft të ashpra ndaj të huajve.
Ndërkohë, deputetja Natali Rickli nga SVP kritikoi veprimin e Xhakës dhe Shaqirit me shqiponjë. “Unë realisht nuk mund të gëzohem. Të dy golat nuk u dhanë për Zvicrën, por për Kosovën. Nëse një ditë fiton kombëtarja e Kosovës, gëzohem për të, por në Kampionatin Botëror ne luajmë dhe bëjmë tifo për Zvicrën”, tha ajo.
I mërzitur ishte edhe presidentit i Serbisë Aleksandar Vuçiç për simbolin e shqiponjës. “Ky ishte një provokimi i futbollistëve shqiptarë, por Serbia nuk duhet të demotivohet.”, deklaroi Vuçiç. Ai shtoi se serbët nuk kanë ofenduar askënd, ashtu siç bënë shqiptarët.
“Kombi ynë është i bashkuar, i bashkuar edhe në trishtim dhe vështirësi, por ne nuk e fyem askënd, sepse e duam vendin tonë dhe nuk e urrejmë askënd. Ne do të mbështesim lojtarët tanë, ne besojmë në fitore në ndeshjen e ardhshme. Dhe, nëse nuk fitojmë, do të vazhdojmë ta duam ekipin tonë”, përfundoi presidenti i Serbisë.
