Nga BoldNews.al
Vendimi i Komisionit të Vetingut për shkarkimin e prokurorit të Apelit të Tiranës, Gentian Trenova, ka çuditur jo pak rrethin e juristëve, si edhe ka shkaktuar reagimin e gazetarëve që ndjekin aktivitetin e institucionit të Prokurorisë, duke hedhur dyshime mbi arsyet e vërteta që kanë nxitur komisionerët të arrijnë në këtë konkluzion.
Gentian Trenova, anëtar i Këshillit të Emërimeve në Drejtësi, përfshihet në listën prioritare të subjekteve që kalojnë në procesin e rivlerësimit kalimtar. Në bazë të deklarimeve të pasurisë, të administruara edhe nga Komisioni i Vetingut, ai rezulton të jetë një ndër zyrtarët me pasuri më të vogël në sistemin e drejtësisë. Megjithatë, KPK konstatoi se ai kishte fshehur pasurinë. Madje, tej etikës dhe pozicionit, edhe përfaqësuesi i Operacionit Ndërkombëtar të Monotorimit mori rolin e “prokurorit” përballë Trenovës.
Gjatë karrierës së tij mbi 10-vjeçare, Trenova rezulton se jeton në një shtëpi 50 m2, për të cilën, me ndihmën e familjarëve, ka arritur të shtojë edhe një sipërfaqe të vogël, sa maksimumi një dhomë tjetër. Vlera e saj në total arrin në rreth 4 milion lekë të reja.
Në pamundësi financiare, ai këtë apartament e ka blerë me kredi dhe më pas, për të ndihmuar familjarët e tij për të marrë një kredi tjetër, ai ua ka dhuruar apartamentin e tij, për ta vendosur si kolateral në bankë. Pra, të gjitha veprimet e tij lidhen me marrje kredie, por që për Komisionin e Vetingut dhe vëzhguesi ndërkombëtar ia kanë konsideruar si “deklarim të rremë të pasurisë”.
Gjithashtu, Komisioni i Vetingut, në kapërcim të kompetencave të tij, duke marrë atributet e gjykatës, ka dhënë vlerësime negative edhe për dy vendimmarrje të prokurorit Trenova.
Në përfundim, KPK vendosi shkarkimin e tij, duke shkaktuar pakënaqësi publike për këtë konkluzion, kjo nisur edhe nga fakti se Komisioni i Vetingut nuk është treguar kaq rigoroz me të tjerë gjyqtarë, të cilët morën dritën jeshile për vijimin e detyrës.
Kryetari i Gjykatës Kushtetuese, Bashkim Dedja, u duk se ishte fare pranë shkarkimit, kur gjatë seancës dëgjimore, trupa e Vetingut konstatoi fshehje të pasurisë, më konkretisht të një apartamenti në Durrës, si edhe mungesë burimesh të ligjshme për blerjen e një apartamenti rreth 150 mijë euro në Tiranë. Por, në mënyrë të çuditshme, Komisioni i Vetingut, në vendimin e tij përfundimtar, konkludoi se Bashkim Dedja përmbushte kriteret për të vijuar detyrën. Vetë Dedja, në një prononcim për median, e konsideroi procesin e Vetingut si “të kalosh varrin”.
Anëtarja e Gjykatës Kushtetuese, Vitore Tusha, kishte kryer transaksione të dyshimta për blerjen e një apartamenti, në vlerën e mbi 55 mijë eurove. Ajo fillimisht kishte paguar një pjesë të parave me këste me afat të përcaktuar. Më pas, firma ndërtuese, i jep hua pa afat gjyqtares rreth 25 mijë euro, që të paguajë pjesën e mbetur të apartamentit. Pra, firma ndërtuese nxori para nga xhepi i saj, ia dha gjyqtares Tusha, e cila, ia riktheu sërish firmës, duke u shndërruar në pronare të apartamentit. Këto manovra nuk u vlerësuan të dyshimta as për KPK-në dhe për vëzhguesin ndërkombëtar të ONM.
Ndërkohë, Komisioni i Vetingut nuk dëshmoi aspak tolerancë, përkundrazi e vendosi në “bankën e të akuzuarve” prokurorin Trenova, i cili posedon një pasuri disafish më të vogël se anëtarët e Gjykatës Kushtetuese që e kaluan testin e Vetingut.
Në rrethet e juristëve dhe gazetarëve, vendimi negativ për Trenovën duket se ka sfond politik. Në vitin 2013, prokurori Trenova ishte përgjegjës për hetimin e çështjes së njohur si “Serveri i Tatimeve”, të nisur nga Prokuroria e Tiranës. Në atë kohë, ish-përgjegjësi i IT në Drejtorinë e Përgjithshme të Tatimeve konstatoi anomali të theksuara dhe ndërhyrje në serverin qëndror të institucionit, ku ruheshin miliona deklarata tatimore të subjekteve private në Shqipëri.
Shefi i IT dyshonte se veprimet anti-ligjore ishin ndërmarrë me urdhër të Drejtoreshës së Përgjithshme të Tatimeve, Briseida Shehaj, e cila sapo ishte vendosur në atë detyrë, pas marrjes së pushtetit nga Partia Socialiste, në bashkëpunim me disa zyrtarë të lartë, shumë pranë kryeministrit Edi Rama.
Prokurori Gentian Trenova u caktua për hetimin e kësaj, por shumë shpejt u përball me presione dhe shantazhe, përfshirë edhe mediatike, ndaj eksponentë të maxhorancës. Disa prej tyre nuk hezituan ta konsideronin prokurorin si “të djathtë”, pavarësisht se prokurori, sipas Kushtetutës, është i pavarur në ushtrimin e funksioneve të tij.
Ndërkohë që ishte nën hetim dosja e “Serverit të Tatimeve”, prokurori Trenova emërohet në Prokurorinë për Krime të Rënda dhe çështja u ndoq nga një tjetër prokuror. Por, pavarësisht se nuk e kishte më nën hetim “Serverin e Tatimeve”, Trenova u “damkos” si “i djathtë”, gjë e cila shihet nga shumë kolegë të tij sot si arsyeja kryesore që ai u “dogj” në provimin e Vetingut.
Prokurori Trenova u akuzua nga Komisioni i Vetingut dhe vëzhguesi i huaj se “cënoi besimin e publikut”, por, në fakt, vendimmarrja e KPK-së ndaj tij duket se cënoi më shumë besimin e publikut tek ky institucion.
