Nëse Leo Messi merr një goditje si ajo e djeshmja, përfundon në faqet e para të gazetave. Por si gjithmonë medalja ka dy anë, pasi dështimi i Argjentinës nuk mund të eklipsojë atë mbrëmje ëndrrash të Kroacisë. Duke u kualifikuar ky ekip i ka treguar botës se çfarë është e aftë të bëjë.
Skuadra e drejtuar nga trajneri Dalić ka mundur Argjentinën duke qenë superiore në çdo aspekt. Lojtarët e Sampaoli-t, duke përjashtuar Messi-n dhe Aguero-n, nuk vlejnë sa kroatët. Ata kanë në përbërje një mesfushe që nëse nuk është më e mira e Rusi 2018, i afrohet shumë. Kroacia ka teknikë të shkëlqyeshme, përvojë të ndeshjeve të mëdha (disa nga lojtarët e saj luajnë në klubet më të mira të Evropës), fizikun dhe frymën e ekipit që vjen nga fakti se kanë luajtur së bashku për shumë vite. Nëse kompaktësia e mbrojtjes do të jetë ajo e dy ndeshjeve të para (0 gola të pësuar), kjo Kroaci do të ecë goxha përpara.
Gjithashtu edhe për shkakun se udhëheqësi i këtij ekipi është Luka Modriç, lojtar që meriton Topin e Artë, edhe pse ndoshta nuk do ta fitojë kurrë. “Gjëja më e rëndësishme – komentoi Modriç pas ndeshjes – është se e kemi arritur qëllimin tonë, duke u kualifikuar për raundin e dytë. Nuk duhet të ndikohemi nga euforia. Besimi ynë do të rritet, kemi treguar se ne mund të arrijmë gjëra të mëdha, por duhet të qëndrojmë me këmbë në tokë. Është e vërtetë që kemi zhvilluar një ndeshje të përsosur “.
