Xherdan Shaqiri ka qenë protagonisti kryesor i ndeshjes së sotme mes Zvicrës dhe Serbisë duke shënuar golin e fitores 2-1 për të shpërthyer pastaj me një festim me “shqiponjë” e duke hequr fanellën.
Menjëherë pas përfundimit të sfidës, ai është pyetur për këtë festim të tij, por Shaqiri ka ruajtur qetësinë dhe ka deklaruar se ky nuk ishte momenti për të folur për një festim, duke e cilësuar thjesht emocional.
“Nuk dua të flas për këtë, në futboll ke emocione dhe mund ta shihni çfarë bëra. Është vetëm emocion, jam shumë i lumtur që shënova. Nuk mendoj se është koha të flasim për këtë festim”, ishin fjalët e Shaqirit.
Më pas, ai ka folur për ecurinë e Zvicrës dhe mendon se përmbysja e sotme e rezultatit tregon që ekipi ka pësuar një rritje të ndjeshme.
“Sa i takon përmirësimit tonë, e kemi treguar prej vitesh dhe e shfaqëm përsëri sot në fushën e lojës. Ata ishin në avantazh 1-0 por ne përmbysëm gjithçka. Këta lojtarë luajnë në klubet e mëdha në të gjithë Europën. Ata e ruajtën qetësinë në çdo moment. Ne e kthyem ndeshjen dhe kjo është diçka të cilën nuk do të kishim mundur ta bënim dy vite më parë”, theksoi Shaqiri.
