Timo Werner ka premtuar se ai dhe shokët e tij të skuadrës te Gjermania do të luajnë si të ishin duke luftuar për jetën e tyre të shtunën kundër Suedisë, për të marrë tri pikët e para në Kupën e Botës e për të shmangur daljen nga turneu shumë para kohe.
Vetë sulmuesi tregoi një formë të dobët në ndeshjen e parë kundër Meksikës, por premton se Gjermania do të jetë ndryshe këtë herë. “Kemi shumë lojtarë që kanë fituar aq shumë në karrierën e tyre dhe ata nuk duan ta mbyllin me një eliminim që në fazën e grupeve”, tha sulmuesi i Leipzig. “Do të ishte një dështim personal edhe për ta. Ndërsa lojtarët e rinj si unë do të udhëhiqen nga të vjetrit. Të gjithë e dimë për çfarë bëhet fjalë dhe do të luftojmë si të bëhej fjalë për jetët tona”.
Një tjetër lojtar i kritikuar pas paraqitjes së dobët të bërë kundër Meksikës është edhe Sami Khedira. Por mesfushori i Juventusit ka qeshur me të madhe kur një gazetar suedez i dha me shaka një ofertë për bileta të lira kthimi për në Gjermani.
“Nuk besoj se do të na duhet kjo deri në 16 korrik” tha Khedira, duke përmendur ditën pas përfundimit të finales së Kupës së Botës. Ndërsa për sa i përket kritikave, kryesisht nga Effenberg dhe Matthaus, të cilët kanë bërë thirrje që ai të mos jetë në formacion, Khedira shtoi: “Nuk e kam problem, mund të jetoj me kritikat. E njoh veten dhe e di që nuk luajta mirë. Duhet të tregohemi më të zgjuar dhe të luajmë si skuadër”.
Por edhe nëse Low vendos ta ulë në stol, Khedira thotë se do ta pranonte vendimin: “Nuk e kam problem fare. Këtu nuk bëhet fjalë për individë por për skuadrën. Jemi nën presion më herët se zakonisht dhe nuk kemi altnernativë tjetër veç fitores”
