Ish-kapiteni i Anglisë David Beckham ka parashikuar se Tre Luanët do të arrijnë në finalen e Kupës së Botës, aty ku do të përballen me palën tjetër, Argjentinën dhe Messi-n. Djemtë e Gareth Southgate e nisën sezonin e tyre me fitore kundër Tunizisë të dielën, duke u pozicionuar në një vend të rëndësishëm për t’u kualifikuar në raundet pasardhës.
Dhe BEckham, i cili nuk ka kaluar asnjëherë fazën çerekfinale si lojtar, është i bindur nga performanca e lojtarëve. “Besoj se Argjentina do të luajë kundër Anglisë në finale”, tha 43-vjeçari në një event reklamues në Kinë.
“Normalisht që zgjedhja ime për të fituar këtë kompeticion është Anglia, por dua të them se jam i pasionuar dhe i vendosur për shtetin tim”, shtoi ai. Sidoqoftë, ish-lojtari i Manchester United dhe Real Madridit, i cili u ndëshkua me të famshmin karton të kuq kundër Argjentinës në Kupën e Botës në vitin 1998, paralajmëroi se do të jetë një rrugë e vështirë përpara.
“Jam shumë i lumtur që ne fituam ndeshjen e parë në grup”, vijoi Beckham. “Anglia është ekip i ri në moshë dhe ata nuk kanë shumë eksperiencë në Kupën e Botës, ndaj ajo do të jetë e vështirë për ata sepse ka shumë skuadra të mira në turne”.
Anglia do të kërkojë që të sigurojë kualifikimin në 16 më të mirat në përballjen kundër Panamasë të dielën në mbrëmje. Argjentina, e cila mund të përballet me Anglinë në gjysmëfinale ose finale, barazoi 1-1 kundër Islandës në takimin e parë ndërsa do të përballet me Kroacinë.
