Nuk ka 2 pa 3. Nëse kjo shprehje e njohur bazohet tek e vërteta, atëherë Gjermania duhet të nisë të shqetësohet seriozisht. Suedia gjatë 2 viteve të fundit është konfirmuar si vrasësja e të mëdhave.
Në eliminatoret e Kupës së Botës, skandinavët ndodheshin në të njëjtin grup me Holandën e Francën. Përballë “Gjelave” arritën të triumfonin në një rast, por suksesi më i madh erdhi, edhe pse jo drejtperdrejt, kundër “tulipanëve”. Sfidat direkte folën në favor të holandezëve, megjithatë në fund rëndësi ka kualifikimi dhe suedezët e mbyllën të dytët, duke siguruar “play-off”-in”, jashtë Botërorit mbetën krijuesit e futbollit total.
Në “play-off” vikingët vinin si skuadra më pak e favorizuar, por në Stokholm e thyen Italinë. Ndeshja e kthimit vërtetoi se Suedia është një skuadër me potencial, pavarësisht se i mungoi një “yll” si Ibrahimovic, të cilin trajneri Andersson nuk pranoi ta rikthente për finalet e Botërorit për të mos cënuar këtë grup kompakt që ishte formuar. Kualifikimi në “San Siro” erdhi nëpërmjet një loje të bazuar te disiplina taktike dhe karakteri.
Në ndeshjen hapësë të Botërorit verdheblutë nuk zhgënjyen, duke thyer 1-0 Korenë e Jugut. Tashmë i pret një tjetër provë e vështirë, çështja është a do të dorëzohet edhe Gjermania përballë “sëpatës” së vikingëve.
