Nga Boldnews.al
Ai ishte i parapërgatitur për këtë shfaqje edhe në Komisionin Parlamentar të Medias dhe Edukimit. Kryebashkiaku i Tiranës Erion Veliaj ia arriti qëllimit që debatin mbi teatrin, që mirëfilltas është një marrëveshje e errët në interesa të ngushta që synon ngritjen e shtatë kullave në qendër të kryeqytetit, ta kthejë në debat politik.
Krah Lali Erit (Erion Veliajt) qëndronte Ministrja e Kulturës Mirela Kumbaro, që kohët e fundit në çdo debat duket se është jashtë lojë në vendimarrje dhe zhvillimet që ndodhin në kulturë. Në mungesë të një “propagandisti” të specializuar, Rama enkas ka vënë në ballë të parë Lali Erin, si i vetmi që mund t’ia dalë debatit me “magjinë” e tij të llafologjisë pa krye e fund.
Në këtë kurth duket se ra edhe opozita, e cila në vend që ta injoronte ligjëratën e stërzgjatur, pa objekt dhe kinse të qëllimshëm të Veliajt, e bëri atë një “gjysmë hero”, pasi iu sulën deputetët e PD-së që ta nxirrnin nga salla. Veliaj ishte një ilegal në atë mbledhje dhe kjo u duk qartë që në momentin që ai vendosi të mos “linte vetëm” ministren e Kulturës Mirela Kombaro, e cila ishte thirrur e vetme që të jepte shpjegim para Komissionit Parlamentar të Medias dhe Edukimit. Pak minuta mbajti ligjëratë Lali Eri dhe më pas ndërhynë deputetët e PD-së, ku mes debatesh arritën që të mbyllnin këtë mbledhje, por i hapën shtegun Veliajt për të marrë sërish protagonizmin.
Para mediave Veliaj tha se artistët nuk ishin kundër prishjes së teatrit, por kishte vetëm dy tre njerëz brenda radhëve të tyre që synojnë të jenë “drejtorë kulture në PD”, pasi shumë të tjerë e mbështesin për një teatër të ri. Gjithashtu kryebashkiaku këmbëngul se çështja e truallit, është vetëm një detaj teknik, pa asnjë vlerë, para “vlerës” së madhe që do i ofrojë Veliaj me teatrin e ri. Si shembull suksesi të dhënies me konçension Lali Eri përmendi stadiumin “Qemal Stafa”, ku është më i veçanti në botë, pasi ka një kullë në mes.
Që të gjtha lëvizjet e fundit të Lali Erit ia zbehën paksa revoltën artistëve, të cilëve më ndërhyrjen direkte të Erion Veliajt kanë nisur ta etiketojnë njëri-tjetrin për anshmëri politike. Në këtë mënyrë Lali i bashkisë, këtë debat moral të artistëve, të cilët duan të ruajnë teatrin si trashëgiminë kultorore, arkitekturë, por edhe si pasuri shpirtërore, po ua rrënon me llomotitje politike, preh e së cilës ra edhe PD-ja, që nuk ua la në dorë artistëve këtë kauz të drejtë, por i hodhi pa dashje “barkë shpëtimi” Ramës dhe Veliajt.
