Islanda shënoi golin e saj të parë dhe mori pikën e tyre të parë në një Kupë Bote dhe Aron Gunnarsson ka pohuar se ai e ka patur tepër të vështirë të flinte gjumë pas ndeshjes. Islanda zhvilloi një performancë të madhe duke barazuar 1-1 me Argjentinën, që konsiderohet si një nga ekipet favorite për ta fituar trofeun më prestigjoz. Ekipi i tij është duke u përgatitur për ndeshjen e radhës ndaj Nigerisë dhe Gunnarsson ka treguar se ata do të duhet të përballen me afrikanët me mentalitetin e njëjtë si kundër “Albiceleste”. “Kam rënë në gjumë në orën katër të mëngjesit, pasi adrenalina ishte ende e lartë për një kohë të gjatë, por është e zakonshme kur luan një ndeshje të tillë”, tha Gunnarsson.
Gjithsesi pika me Argjentinën duhet hedhur pas krahëve dhe fokusi duhet të jetë totalisht te ndeshja e radhës ndaj Nigerisë. Përballë është një kundërshtar i fortë, ndonëse në gjirin e vetë nuk ka futbollistë të mëdhenj si Messi, Aguero apo Di Maria. Këtë fakt te Islanda e dinë mjaft mirë dhe e pranojnë se tani i kënaq vetëm fitorja. “Tani kemi një tjetër ndeshje me rëndësi të madhe kundër Nigerisë. Nëse nuk përqendrohemi ndaj Nigerisë dhe nuk kemi rezultat, atëherë pika kundër Argjentinës nuk do të ketë ndonjë vlerë”, Gunnarsson, një nga lojtarët më të rrezikshëm të islandezëve. Ndeshja ndërmjet Islandës dhe Nigerisë do të zhvillohet këtë të premte në orën 17:00 në “Volgograd Arena” në qytetin e Volgograd. Të besuarit e Heimir Hallgrímsson shpresojnë të përsërisin atë që bënë në Kampionatin Evropian të Francës ku arritën deri në çerekfinale, pasi mposhtën Anglinë. Gjithsesi në këtë kompeticion rivaliteti është shumë i madh, por ky fakt nuk i shqetëson aspak, edhe pse kjo është aventura e tyre e parë në këtë kompeticion prestgjoz.
