Sergio Aguero kërkon që të mos bëhet aq tragjike humbja e penalltisë së Lionel Messi-t në takimin e parë të grupit kundër Islandës.
Argjentina barazoi kundër përfaqësueses modeste, e në shtetin amerikano latin kjo shikohet si humbje, për më tepër që kapiteni humbi penalltinë që do tu jete tri pikët.
“Ndeshja e parë është gjithnjë më e vështirë. Çdo skuadër kërkon që të luajë fort kundër nesh. Ata u mbrojtën mirë, shansi i vetëm i tyre ishte të shënonin nga një goditje dënimi apo këndi ose të shfrytëzonin ndonjë rast. Mendoj se e festuan barazimin si fitore.
Humbja e penalltisë? Leo tregoi se është njerëzor. Ne e mbështesim atë. Ai thjesht kishte një ditë të keqe, por ne e dimë se mund të na japë fitoren në çdo moment të lojës. Shpresoj të jetë më mirë për takimin kundër Kroacisë”, tha Aguero.
Kurse ish-futbollisti i kombëtares argjentinase, që ka luajtur në tre botërorë, Hernan Crespo u shpreh se Messi nuk është Maradona.
“Messi nuk është Diego. Nuk e fiton dot i vetëm Botërorin. Këtë gjë duhet ta kuptojnë të gjithë tifozët dhe shokët e tij të skuadrës. Ai është fenomen nëse e vendos në kushtet e duhura, siç bëjnë te Barcelona. Në të kundërt, e ka të vështirë”, tha argjentinasi.
Ai më pas dha një shembull. “Messi mund të driblojë një ose dy kundërshtarë. Diego u iku 5 anglezëve. A e kuptoni diferencën?”.
Por Crespo kërkon më shumë nga lojtarët e tjerë të kombëtares. “Kush e ndihmoi Messi-n ndaj Islandës? Di Maria nuk dribloi kurrë kundërshtarin, mesfushorët nuk ndihmuan. Argjentina nuk luan si skuadër, por pret që Messi të shpikë diçka. Nuk mund ta lësh përgjegjësinë e çdo aksioni te një lojtar i vetëm”.
Crespo nuk harroi që të bënte një krahasim edhe me ylli e Portugalisë, Crisitano Ronaldo “CR7 luan vetëm, vrapon, ka fizik, godet dhe shënon. Messi, për të qenë Messi, ka nevojë për ekipin”.
