Trajneri i kombëtares së Argjentinës, Jorge Sampaoli, ka zbuluar formacionin me të cilin skuadra e tij do të nisë ndeshjen e nesërme kundër Islandës, e para për “çelestët” në Kupën e Botës, “Rusi 2018”. “E di cili është kurioziteti juaj më i madh, formacioni, – tha Sampaoli. – Nuk ka arsye përse unë ta mbaj sekret: Caballero, Salvio, Otamendi, Rojo, Tagliafico, Biglia, Mascherano, Meza, Messi, Di Maria, Aguero.”
Më pas argjentinasi shtoi: “Kisha 34 futbollistë në planet e mia në fillim të majit. Tani kam përcaktuar ekipin që do ta nisë nga minuta e parë ndeshjen kundër Islandës.”
I pyetur për Leo Messi, “yllin” e madh të Argjentinës, Sampaoli deklaroi: “Leo është shumë mirë, i motivuar dhe i përgjegjshëm. Do të jetë Botërori i katërt për të dhe nuk mendoj se do të jetë i fundit. Messi e dashuron futbollin, futbolli e dashuron atë dhe ka ende shumë për të dhënë.”
