Nga Boldnews.al
Kryeministri shquhet për nismat e tij në dëm të qytetarëve që nuk konsultohen me grupet e interesit. Kështu bëri me taksën e rrugës Durrës-Kukës, ku ua vendosi traun kuksianëve në derë të shtëpisë, por pas reagimit të tyre u tërhoq. Iu tremb flakës e tymit që doli nga protesta, sepse gjuha e zjarrit do i kapte pragun e derës së kryeministrisë. Vetëm pas një reagimi Rama tërhiqet, edhe pse nuk heq dorë nga nismat e tij, që shpesh bien në dëm të qytetarëve.
Megjithatë Rama provon, hedh një ide dhe rri e pret. Nëse reagimi është i vakët, nis talljet në çdo dalje publike. Kundërshton e fyen çdo komentues në faqen e tij në rrjetet sociale, merr yrysh në dhunën verbale ndaj mediave. Kohët e fundit ai hapi sfidë me artistët. E ka vendosur për tu prishur Teatrin Kombëtar, godinën e ndërtuar në vitet 30’ që për nga arkitektura është ndër më të veçantat në kryeqytet. Por dyshja Rama-Veliaj kërkon ngritjen e shtatë kullave në truallin e Teatrit Kombëtar dhe për këtë interes të tyre janë gati të rrënojnë gjithçka, duke ia atribuar vetes pushtetin e më të fortit. Por diçka duket se nuk po shkon sipas skenarit.
Reagimi i artistëve duket se e ka zbrapsur për momentin Edi Raman, madje ka kërkuar që të fusë në lojë manipulatorin e shquar Erion Veliajn. Ai është i aftë të turbullojë mendjet e shumëkujt, por Ramës dhe Veliajt i ka ardhur andej nga nuk e prisnin. Artistët, veçanërisht një pjesë e njohur aktorësh, tashmë po “luajne” me nervat e Ramës. Mund të duket paksa çudi, por ata janë të vetmit që e kuptojnë Ramën, formimi i të cilit është tërësisht në shkollën e pikturës, (ndonëse edhe në këtë fushë nuk shkëlqeu kurrë).
Me Teatrin Kombëtar nuk është vetëm shembja e një godine, qoftë ajo edhe me vlera të mëdha arkitekturore dhe shpirtërore, por është domethënie se pushteti i gërshetuar qëndror dhe lokal, po shkel me këmbë çdo reagim. Në këtë rast Rama dhe Veliaj po përdorin teorinë “përça e sundo”, duke futur mes aktorësh edhe zëra që janë në një linjë me qeverinë.
Grupi nismëtar i protestës këtë film të njohur të Ramës dhe Veliajt e ka kapur tashmë dhe duken të vendosur për të mos lëshuar aspak, duke kërcënuar deri në mbyllje brenda godinës së Teatrit Kombëtar, për të mos lejuar shembjen e tij. Nëse kjo do të ndodhë, atëherë çirret “piktura” me kulla e Edi Ramës dhe Erion Veliaj, çka mund të nxisë frymën e protestës nga qytetarët, që kanë një mbushje nga arrogance qeveritare, ankohen për pasigurinë, janë të lodhur nga skandalet e qeverisë e mbi të gjitha nga kokëulur të përhershëm mund të bëhen të papërmbajtshëm ku qeveria vëç arrogancës kërkon edhe t’i poshtërojë. Me një opozitë ende pa besim të fortë në publik dhe mungesë fryme, artistët mund të jenë ata që të provojnë reagimin dhe rëvoltën që mund të injektohet tek qytetarët. Sepse ata e njohin më mirë “shpirtin artistik” të piktorit Edi Rama, që qeverisjen dhe Shqipërinë ka nisur ta shohë si një tablo që mund ta vizatojë sipas dëshirës…
