Trajneri i Egjiptit, Hector Cuper ka komentuar mungesën e Salah në ndeshjen debutuese ndaj Uruguait, që u luajt sot në orën 14 dhe u fitua nga amerikano-jugorët me rezultatin minimal 0-1. Argjentinasi tha se sot nuk dëshironte të rrezikonte me Salah, duke qenë se edhe dy ndeshjet pasardhëse do të jenë shumë të rëndësishme.
“Pati shumë optimizëm për Salah, por sot paradite bëmë disa kontrolle të tjera dhe vendosëm të mos rrezikojmë, pasi mund të dëmtohej më keq. Mendoj se kemi ende dy ndeshje të rëndësishme, ndaj Arabisë Saudite dhe Rusisë, ku Salah do të jetë plotësisht i gatshëm”, tha ish trajneri i Interit.
Hector Cuper komentoi edhe ndeshjen e skuadrës së tij, që u mposht nga një gol i Gimenez, shënuar vetëm në minutën e 90 të takimit, ndonëse deri atëherë po menaxhonte mjaft mirë lojën.
“Treguam një lojë mjaft të mirë grupi, duke menaxhuar mirë thuajse çdo situatë, ndonëse përballë kishim një kundërshtar aspak të lehtë. Po të kishim Salah, do të ishim më të rrezikshëm në sulm dhe mund të merrnim më shumë, por gjithsesi jam i kënaqur me paraqitjen e sotme në tërësi”, deklaroi Hector Cuper.
