Manovrat kryesore të përbashkëta ushtarake amerikano-koreane, të cilat zhvillohen rregullisht janë pezulluar në mënyrë përfundimtare, njoftoi sot për shtypin një zyrtar i lartë amerikan.
Manovra e ardhshme e përbashkët e planifikuar, e quajtur “Ulchi Freedom Guardian”, pritej të zhvillohej në fund të muajit gusht fillim shtatori, si çdo vit.
Koreja e Veriut kërkon prej kohësh dhënien fund të manovrave, të cilat i konsideron si përsëritje e pushtimit të përgjithshëm të territorit të saj. Pheniani ka reaguar shpesh me anë të operacioneve të saj ushtarake, raporton atsh.
Gjatë konferencës së shtypit që u mbajt të martën në Singapor, presidenti Trump njoftoi fundin e manovrave, por pa saktësuar kohën e hyrjes në fuqi të ndërprerjes së operacioneve ushtarake. Sekretari i Shtetit, Mike Pompeo theksoi se ky vendim ishte i kushtëzuar nga vijimi i negociatave produktive me Korenë e Veriut.
