Një sherr i dhunshëm ka ndodhur natën mes së dielës dhe së hënës në Ans (Liège, Belgjikë) dhe sipas medieve vendase, protagonistë kanë qenë shqiptarët. Një grua ka mbetur e vdekur gjatë përleshjes, ndërsa katër persona të tjerë janë plagosur rëndë.
Identiteti i viktimave nuk bëhet i ditur, ndërsa mediat belge raportojnë këtë të hënë se është shënuar një përleshje mes bandave rivale shqiptare.
“Personat e përfshirë kanë përdorur shufra hekuri, shkopinj bejsbolli dhe thika”, citohet zyra e prokurorit të Liège.
“Një grua 42-vjeçare humbi jetën pas lëndimeve të shumta që mori”, njoftoi prokuroria. Raportohet se gruaja, pjesë e një prej bandave rivale, ndryri për të ndihmuar një mikun e saj të plagosur, por një makinë e përplasi.
Një nga dëshmitarët, teksa flet për “RTL”, e cilëson ngjarjen si një skenë luftë. “Fillimisht mendova se bëhej fjalë për një aksident”, shpjegon dëshmitari i cili për shkak të frikës nga hakmarrja dëshiron të mbetet anonim. “Një makinë u ngjit në trotuar dhe i goditi njerëzit atje”, shton.
Raportohet se për momentin, edhe pse disa individë që kanë marrë pjesë në përleshje janë identifikuar, asnjëri prej tyre ende nuk është arrestuar. Hetimi është ende në vijim.
