Çdo gjë është gati për samitin mes presidentit amerikan Donald Trump dhe liderit të Koresë së Veriut Kim Jong-un që do të mbahet më 12 qershor në ishullin Sentosa të Singaporit, konfirmoi ministri i Punëve të Jashtme të Singaporit Vivian Balakrishnan.
Autoritetet e Washingtonit dhe Phenianit, sipas ministrit të Singaporit, janë të kënaqura me rregullat e samitit dhe janë të gatshëm të zgjidhin problemet që ekzistojnë për 70 vjet.
Balakrishnan në fillim të javës ishte në Washington ku u takua me Sekretarin amerikan të Shtetit, Mike Pompe dhe Këshilltarin e Sigurisë Kombëtare të Shtëpisë së Bardhë, John Bolton. Gjatë javës në Phenian ai u takua gjithashtu me homologun e tij, Ri Yong Hoom.
Singapori si një nga vendet më të vogla në botë do të presë një nga takimet më të rëndësishme diplomatike në dekadat e fundit, atë mes Trump dhe Kim, liderët e njërit nga shtetet më të fuqishme dhe njërit nga shtetet më të varfra në botë.
Opinioni në Gadishullin Korean në përgjithësi mirëpret Samitin e ardhshëm Trump-Kim që do të mbahet më 12 qershor në Singapor, por qarqet konservatore në Seul nuk e fshehin habinë për faktin se Trump është dakorduar për samitin pa ndonjë garanci paraprake nga pala tjetër.
