Trajneri i Kukësit, Peter Pacult, ndodhet në Austri për pushime, pas një sezoni të suksesshëm me verilindorët.
Në një prononcim për mediat vendase, Pacult e bën fakt të kryer dënimin e Skënderbeut dhe është i bindur që skuadra e tij do të marrë pjesë në Champions dhe do të synojë të shkojë larg.
Austriaku tregon për mediat, edhe për kushtet në futbollin shqiptar.
“Tani synojmë të shkojmë larg në Champions League. Edhe ëndrrat janë të lejuara. I mendojmë të gjitha, edhe nëse shkojmë në grupet e Europa League do të ishte një arritje spektakolare.
Ndeshjet ndërkombëtare do t’i luajmë në Shkodër, Mali i Zi është një hap larg. Stadiumi aty është rinovuar para 4 vitesh dhe kombëtarja i luan aty ndeshjet shtëpiake.
Natyrisht, jetojmë e stërvitemi në Tiranë, ndeshjet e kampionatit i luajmë në Kukës dhe për Europën shkojmë në Shkodër: nuk janë kushte optimale, por mundohemi të bëjmë maksimumin”, tha tekniku i verilindorëve.
Austriaku flet dhe për marrjen e drejtimit të skuadrës së Kukësit. ”Ishte një moment shumë i keq, edhe fizikisht nuk isha në rregull, por në janar firmosa në Shqipëri. Deri në ditën që nisa punë, humba disa kilogramë. Nuk mund të dalësh para skuadrës me barkun te goja. Tani ndihem mirë, vrapoj, jam aktiv edhe në stërvitje. Tani jam i lumtur, po ecim mirë, puna është e këndshme, vlerësohemi nga drejtuesit dhe nga media”, u shpreh Pacult.
