Davide Astori nuk vdiq në gjumë. Ky është rezultati i ekzaminimit mjekoligjor, i kryer në trupin e kapitenit të Fiorentinës, që humbi jetën në mënyrë të papritur gjatë grumbullimit të skuadrës së tij në prag të transfertës me Udinesen.
Ajo që i shkaktoi vdekjen Astorit ishte rritja e menjëhershme e rrahjeve të zemrës, që njihet ndryshme si takiritmi, e kundërta e rezultatit që u nxor nga autopsia e parë (rrahjet e ngadalta të zemrës).
Sipas mjekëve Carlo Moreschi dhe Gaetano Thiene, që janë kujdesur në veçanti për të zbuluar të vërtetën, zemra e Astorit ka nisur krejt papritur të rrahë me shpejtësi dhe për fat të keq nuk ka patur njeri afër për ta ndihmuar.
Kjo është drama e vërtetë e ish-kapitenit të Fiorentinës, sepse nëse do ta ndante dhomën me një shok të skuadrës, do të ishte dhënë alarmi e me shumë mundësi sot do të ishte gjallë.
Davide preferoi të qëndronte vetëm pas mesnate, pasi luajti me portierin Sportiello lojëra elektronike. Në mëngjes u gjet i pajetë, i vetëm, në dhomën e tij.
Por a do të hetohet kjo ngjarje e rëndë dhe a mund të ketë të dënuar?
“Nuk mund të parashikoj asgjë”, tha ndihmës prokurori i Udineses, Antonio De Nicolo.
“Unë mund të them se një dosje për persona të panjohur është e hapur. Kolegu im po studion dokumentin. Do të marrim një vendim kur të përfundojë puna jonë”, shtoi ai.
