Nga Boldnews.al
Ambasadori italian në Tiranë, Albert Cutillo, ka marrë rolin e avokatit, vëllait të ministrit të Brendshëm Fatmir Xhafaj dhe ka bërë publikisht disa llogari se sa kohë duhet të qëndrojë në burg Agron Xhafaj.
Diplomati italian, pavarësisht se nuk është gjyqtar apo prokuror, ka marrë përsipër që të zbusë efektet e dënimit të “Gonit”, ndoshta në një përpjekje për t’i dhënë një dorë qeverisë së Edi Ramës, e cila gjendet në vështirësi për këtë rast.
Sipas procedurës së vendeve demokratike, llogaritjet për qëndrimin në burg të një personi të dënuar kryen nga prokurori i ekzekutimeve të vendimeve penale dhe miratohen nga gjykata. Pra, janë vetëm këta autoritete që vendosin se sa do të qëndrojë efektivisht në burg një person.
Por, për Agron Xhafaj, këto llogari janë bërë nga ambasadori italian në Tiranë. Në një intervistë për tv Klan, Alberto Cutillo u shpreh se “Personi është dorëzuar vullnetarisht në Policinë Kufitare të Fiumiçinos dhe është transferuar në burgun e Civitavecchia pranë Romës, ku do të vuajë dënimin. Pak a shumë dënimi ishte 4 vjet e dy muaj. Pasi vuajti një muaj, në kohën kur u arrestua mbeten edhe 4 vjet e 28 ditë. Në të tilla raste nëse i burgosuri bën kërkesë mund të lirohet shumë më herët se kjo datë. Nuk e di si do të zhvillohet çështja, por me shumë mundësi periudha që duhet të kalojë në burgim do të jetë shumë më e shkurtër”, thotë ai për TV Klan.
Pra, me fjalë të tjera, ambasadori italian në Tiranë jep mesazhin që nuk i duhet dhënë shumë peshë publike këtij rasti, pasi Agron Xhafaj do të lirohet shumë shpejt. Por, në fakt, denoncimi i opozitës nuk lidhej me faktin se sa do të qëndroj në burg Agron Xhafaj, por lidhej me mosveprimin e vëllait të tij, ministrit të Brendshëm Agron Xhafaj, i cili dyshohet se ka kryer disa veprime për të mbrojtur vëllain e tij nga vuajtja e dënimit.
Megjithatë, nuk është rasti i parë kur ambasadori Cutillo i del në krah qeverisë së Edi Ramës, kur ajo gjendet në vështirësi të mëdha, të cilat lidhen direkt apo indirekt me Italinë.
Dy vjet më parë, kur në Shqipëri shpërtheu skandali “Imsi Catcher”, që lidhej me përdorimin e paligjshëm nga ana e Policisë shqiptare të një pajisjeje përgjimi të marrë nga homologët e tyre italianë, Cutillo u mundua t’i hedhë ujë zjarrit politik dhe publik në Shqipëri.
Prokuroria shqiptare nisi hetimet, mbi bazën e dyshimeve se një bërthamë e policisë së shtetit kryente përgjime të paligjshme, kryesisht të politikanëve dhe zyrtarëve të lartë shtetërorë. Por, në kohën kur prokuroria po mendonte që të kryente disa arrestime, ambasadori italian i përcjell Prokurorit të Përgjithshëm të asaj kohe letrën e komandatit të Policisë Italiane, Alessandro Pansa, ku deklarohej se “Imsi catcher nuk realizonte përgjime”.
Por ajo që nuk thuhej në letrën përcjellëse të ambasadorit ishte fakti se Alessandro Panza nuk ishte drejtor i Policisë Italiane. Për më tepër, letra e Panzas nuk kishte as firmë, as vulë, as datë dërgimi. Pra, ambasadori italian i përcolli Prokurorit të Përgjithshëm një letër, e cila kurrësesi nuk mund të quhej zyrtare. Madje, Cutillo shkoi më tej, kur ai e bëri edhe këtë letër publike, ndoshta me synimin për të shuar zhurmën politike që shkaktoi skandali “Imsi Catcher” në atë kohë.
Në fakt, “Imsi Catcher” e vuri në vështirësi të mëdha ambasadorin Cutillo, pasi edhe njerëz pranë tij rezultonte se ishin të përfshirë. Pajisja e dyshuar si e përgjuar kishte mbërritur në Shqipëri nëpërmjet ndërhyrjes së shefit të misionit “Interforze” në Tiranë, Michelle Grillo, një prej njerëzve më të afërt të ambasadorit.
Grillo u largua nga Shqipëria menjëherë pasi shpërtheu skandali, por ambasada italiane mohoi që ai ishte larguar për këtë shkak. Në një qëndrim publik të asaj kohe, ambasada deklaroi se Grillo ishte larguar për të kryer pushimet vjetore. Por ai nuk u kthye më në Shqipëri.
Pra, ambasadori Cutillo nuk rezulton të ketë pasur mandat diplomatik të qetë në Shqipëri. Diplomatit i është dashur, ndoshta edhe si një zgjedhje e tij, për të qëndruar në krah të qeverisë, sa herë kjo e fundit ka probleme me skandalet ligjore.
