KPK ka nisur mëngjesin e sotëm, seancën dëgjimore për gjyqtarin e Gjykatës së Lartë, Edmond Islamaj.
Ai është paraqitur i vetëm në këtë seancë, pa marrë avokat duke treguar kështu vetëbesim për pasurinë dhe karrierën e tij. Sipas njoftimit zyrtar, për Islamajn ka përfunduar hetimi pasuror dhe ai mbi figurën dhe aftësitë profesionale.
Relatorja, Genta Tafa Bungo, u shpreh me nota pozitive ditën e sotme për përfundimet e këtij hetimi.
‘Sipas IDKPKI deklarimet e Islamajt janë të sakta, ka burime të ligjshme për justifikimin e pasurisë. Nuk ka konflikt interesi. Sipas hetimit administrativ të KPK në vitin 2017 Islamaj ka deklaruar një apartament në Durrës, 87 metra katrorë që e zotëron me prindërit, tokë are në Karpen të Kavajës, 1000 metra katrorë, llogari depozite kursimi e krijuar ne vitin 2000 me vlerë 5 mije euro dhe depozitë kursimi 20 mije euro ne vitin 2016’, tha Bungo.
Duket se sipas këtij relacioni anëtari I Gjykatës së Lartë, Edmond Islamaj, do të jetë burri i parë që me shumë gjasa do të kalojë sitën e vettingut. Nga zbatimi i deritanishëm i ligjit, asnjë prokuror apo gjyqtar i gjinisë mashkullore nuk ka mundur dot të kalojë skanerin e trefishtë të vetingut, për t’u bërë pjesë e drejtësisë së re që po konstituohet.
Bilanci i deritanishëm është: nga 3 subjekte burra të verifikuar, asnjëri prej tyre nuk është konfirmuar në detyrë.
Krejtësisht tjetër shfaqet panorama e deri tanishme, për femrat e sistemit të drejtësisë. Nga 7 prokurore dhe gjyqtare gra të verifikuara deri më tani për ligjshmërinë e pasurive, lidhjet e mundshme me krimin dhe aftësitë profesionale, janë konfirmuar në detyrë 5 prej tyre.
