Kreu i diplomacisë ruse, Sergei Lavrov mbërriti sot në Phenian, njoftoi media koreano-veriore, në një kohë kur po përgatitet një samit historik mes liderit koreano-verior, Kim Jong Un dhe presidentit amerikan, Donald Trump.
“Sergei Lavrov zhvilloi një vizitë në Phenian me ftesë të homologut koreano-verior, Ri Yong Ho”, theksoi agjencia zyrtare e lajmeve KCNA.
Ajo nuk jep asnjë detaj, por agjencia ruse e lajmeve TASS njoftoi se dy ministrat kishin filluar diskutimet në ndërtesën e Asamblesë së Lartë Popullore, Parlamenti koreano-verior, në Phenian.
Bëhet fjalë për vizitën e parë në Korenë e Veriut të Lavrov që prej vitit 2009, sipas TASS.
Ministri rus i Punëve të Jashtme theksoi të mërkurën se qëllimi i vizitës ishte diskutimi për çështjet dypalëshe, situatën në Gadishullin Korean dhe çështjet ndërkombëtare dhe rajonale.
