Ekipi i Skënderbeut është fituesi i Kupës së Shqipërisë në përballjen me Laçin. Korçarët arritën fitoren 1-0 pas një penalltie të kundërshtuar nga ekipi laçian. Në këtë mënyrë Skënderbeu në këtë sezon arrin të marrë dy trofe, Kampinatin dhe Kupën e Shqipërisë.
Fatet e takimit u volosën në minutën e 67 të takimit. Një penallti e fituar nga Xhejms, por shumë e diskutuar, pasi ishte në limitet e hyrjes së zonës, ka vendosur takimin. Laçianët protestuan shumë, por gjyqtari Hamiti pasi u konsultua edhe me asistentët vendosi për penallti.
Lilaj nuk gaboi nga 11 metra. Deri në fund, ekipi i Dajës menaxhoi rezultatin, dhe arriti dopietën e këtij sezoni.
