Presidenti i Venezuelës Nicolas Maduro ka fituar një tjetër mandat për të drejtuar vendin.
Fitorja e tij ka ardhur me një votim të dëmtuar nga bojkoti i opozitës dhe pretendimeve për manipulim të votave.
Mes një krize të rëndë ekonomike, vetëm 46% e elektoratit doli në votim, raporton BBC.
Kandidati kryesor nga radhët e opozitës, Henri Falcon ka kundërshtuar rezultatin e zgjedhjeve pas mbylljes së kutive të votimit.
“Ne nuk e njohim si të vlefshëm këtë proces zgjedhor, ne duhet të kemi zgjedhje të reja në Venezuelë”, tha ai.
Shefja e Këshillit Kombëtar Zgjedhor, Tibisay Lucena, ka thënë se pas numërimit të më shumë se 90 përqind të votave, Maduro ka fituar 67.7 përqind apo 5.8 milionë vota dhe Falcon ka fituar 21.2 përqind apo 1.8 milion vota.
Falcón ka pohuar se votimi ishte manipuluar në favor të zotit Maduro, duke abuzuar me skanimin e kartave të identitetit.
Edhe administrata e Presidentit të SHBA Donald Trump tha se nuk do ta njohë rezultatin e zgjedhjeve në Venezuelë.
