Selimi – Tre shkodranët e Laçit, Ndriçim Shtubina, Ansi Nika dhe Abdurrahman Fangaj i dhanë një dorë Vllaznisë, duke mundur rivalen e tyre, Kamzën. Vllaznia ka shanse mbijetese në Superiore, por duhet të fitojë në Korçë dhe Partizani duhet të mundë Kamzën. Ndriçim Shtubina ka dhënë një intervistë për “Shkodra.News”, ku mes të tjerash akuzon direkt ish-trajnerin Ernest Gjoka për gjendjen që po kalon Vllaznia. Ish-kapiteni kuqeblu shprehet se trajneri kryeqytetas erdhi në Shkodër si “luan”, por iku si “lepur”: “Ndaj Kamzës ishte një fitore e rëndësishme për ne dhe besoj se do të shkojmë në Kupat e Europës. Teuta e ka siguruar mbijetesën, por në Laç jemi shumë të fortë dhe besoj se do t’i bëjmë një mbyllje të bukur kampionatit. Ajo që mund të them është se e kam vuajtur shumë këtë ndeshje, sepse na duhej fitorja për shumë arsye.
Në radhë të parë për veten tonë, sepse pretendojmë Europën, por dhe një motiv më shumë ishte për Vllazninë. Kjo fitore e jona e mban në lojë edhe Vllazninë. Kemi diskutuar të tre ne shkodranët me njëri-tjetrin dhe u kam thënë se Shkodra i ka sytë edhe nga ne, si djem shkodranë që jemi. Duhej të bënim detyrën. Kush e ka fajin? Këtë gjendje e ka krijuar trajneri Gjoka. Isha i pari në janar që kam folur për të. Në merkaton e janarit ai është pyetur për mua, por e ka anashkaluar emrin tim për rikthimin te Vllaznia. Nuk e harroj veprimin e tij dhe po i them tani Gjokës se po të isha edhe unë trajner i Vllaznisë, do ta kisha shpëtuar me kohë. Jam shumë më i madh se Gjoka në çdo aspekt. Ai erdhi si një luan dhe iku si një lepur. Kam besim se Partizani do të luajë drejt dhe Vllaznia do të shpëtojë edhe këtë sezon. Shpresoj të jetë viti i fundit që luan për mbijetesë. E ardhmja? Në futboll nuk i dihet asnjëherë, në Laç ndihem si mbret’, – ka thënë Shtubina mes të tjerash.
Superliga
Java e 35-të
Të shtunën
Vllaznia – Kukësi 2-1
Kamza – Laçi 1-2
Teuta – Lushnja 6-2
Luftëtari – Skënderbeu 3-1
Flamurtari – Partizani 1-2
Renditja
Skuadra Pikë
Skënderbeu 72
Kukësi 62
Luftëtari 56
Laçi 53
Partizani 53
Teuta 46
Flamurtari 45
Kamza 43
Vllaznia 41
Lushnja 11
Java e fundit
Të mërkurën
Skënderbeu – Vllaznia 17:00
Partizani – Kamza 17:00
Kukësi – Flamurtari 17:00
Laçi – Teuta 17:00
Lushnja – Luftëtari 17:00
