Lamtumira e Bregut: Do jem juaji, përgjithmonë!

Siç tashmë dihet, Dejvi Bregu do të largohet nga Luftëtari, pasi dje ka luajtur ndeshjen e fundit me fanellën bluzi. Në fakt, kontrata e Bregut e lidh futbollistin me Skënderbeun e Korçës, por e ardhmja pritet që të jetë larg Korçës. Në përfundim të ndeshjes ndaj Skënderbeut, Bregu u pa me lot në sy dhe pas ndeshjes shpjegoi se ato lot dilnin nga shpirti dhe ishin lot mirënjohjeje. Nëpërmjet një postimi në rrjetin social “Instagram”, Dejvi Bregu ka dhënë lamtumirën nga klubi gjirokastrite, duke i falënderuar të gjithë për periudhën gjatë së cilës ai ka luajtur me Luftëtarin. “Jeta është e ndërtuar nga cikle dhe erdhi momenti që cikli im 2-vjeçar e gjysmë të mbaroj në mënyrën më të bukur me. Falënderoj çdo shok të ekipit për ndihmën dhe për sfidat qe kemi kaluar, falënderoj çdo trajner që më ka mësuar shumë në këtë periudhë, falënderoj çdo tifoz që më ka përkrahur dhe që është mirënjohës për atë çfarë kam kontribuar për këtë klub. Ndeshja ime e fundit në Gjirokastër në atë që tashmë quhet shtëpia ime e dytë…faleminderit për duartrokitjet e sotme! Lotët e mi sot janë lot mirënjohje që dolën nga shpirti për gjithçka çfarë kam kaluar… I juaji gjithmonë Dejvi Bregu…”,- shkruhej në postimin e mesfushorit.