Renato Arapi brenda dy sezoneve me fanellën e Boluspor në Liga 1 të kampionatit turk të futbollit arriti që të shkojë deri në fazën play-off, por në të dyja rastet është eliminuar duke qenë i pafat që të luante në nivelin më të lartë në Turqi.
Qendërmbrojtësi durrsak tashmë është dhe pa kontratë. Pas dy vitesh te Boluspor tashmë po sheh për të ardhmen. Ai u largua nga Partizani për të firmosur në Turqi në verën e vitit 2016, ndërsa bëri dy sezone të shkëlqyer, duke fituar dhe vëmendjen e skuadrave të Anadollit.
E ardhmja e tij nuk është në pikëpyetje, pasi mundësitë e zgjedhjes për të janë të shumta. Burime pranë shtatlartit bëjnë me dije për eduasportin.com se ai pritet që të firmosë sërish një kontratë 2-vjeçare në Turqi. Skuadra të ndryshme kanë hedhur vështrimin nga ai për t’i dhënë sigur prapavijës, ndërsa është menaxheri i lojtarit që do të bëjë zgjedhjen më të mirë për të ardhmen.
Vetë Arapi ka nisur pushimet dhe është në pritje të së ardhmes së tij. Megjithatë, nuk përjashtohet dhe pista shqiptare në rast se shuma monetare nuk do të jetë bindëse për lojtarin e lindur në vitin 1986.
Për momentin përflitet se do të firmosë te të kuqtë e Partizanit, megjithatë, Vlora nuk do të ishte opsion i keq në rast se do të kishte objektiva madhorë për sezonin e ri. Madje, mësohet se dhe Tirana është interesuar për Arapin, i cili pritet që të vlerësojë mirë ofertat para se të kthehet në Shqipëri.
