Fatmir Xhafaj nuk paraqitet në zyrë, a e ka dhënë dorëheqjen si ministër i Brendshëm?

Ministri i Brendshëm Fatmir Xhafaj nuk ka shkuar në punë sot. Gazetarja Dorjana Bezat referuar burimeve nga Ministria raportoi  se ndryshe nga ditët e tjera kur që në mëngjes shkonte në zyrën e tij, Xhafaj nuk ka shkuar mëngjesin e sotëm.

Po kështu jashtë ambienteve të Ministrisë së Brendshme, ku është parkohet automjeti i ministrit, vendi është bosh. Po kështu raportohet se rreth orës 10:20 ka mbërritur në zyrë zëvendësministri i Brendshëm Julian Hodaj.

Kujtojmë se Partia Demokratike ka kërkuar dorëheqjen e ministrit të Brendshëm prej ditësh duke publikuar materiale që sipas tyre implikojnë Xhafajn me mbrojtjen e vëllait të tij, të dënuar në Itali me 7 vjet e 2 muaj burg për trafik droge. Dje tre përfaqësues të PD, Enkelejd Alibeaj, Gazmend Bardhi dhe Ervin Salianji publikuan një audio-përgjim që sipas tyre tregonte një bisedë mes Agron Xhafajt dhe një trafikanti droge. Ndërkohë që Tirana zyrtare ‘zien’ nga ngjarjet kryeministri Edi Rama ka udhëtuar drejt Francës ku do takohet me Presidentin Manuel Macron.