Eleni Foureira, e cila në Eurovision përfaqësoi Qipron, është në një lidhje me mbrojtësin spanjoll që së fundmi ka luajtur me Olimpiakosin në kampionatin grek, Alberto Botia. 31-vjeçarja është në një romancë që nga viti 2016-të me ish-futbollistin e Barcelonës dhe Sevillas.
Eleni është njohur ndryshe si Beyonce greke, ndërsa është me origjinë shqiptare. Ajo ka lindur në qytetin e Fierit dhe më pas në moshën 8-vjeçare është shpërngulur me familjen në kryeqytetin grek, Athinë. Aty ajo ka mbaruar studimet, ka luajtur në kitarë dhe teatër e më pas i është futur botës së muzikës moderne. Eleni vendosi që të përfaqësojë Qipron në Eurovisionin e këtij viti, duke marrë vendin e dytë.
Gjatë pjesëmarrjes në Eurovision, këngëtarja duket që nuk e ka harruar origjinën e saj dhe ka bërë simbolin e shqiponjës me artistin shqiptar, Eugent Bushpepa. Të njëjtin veprim e ka bërë edhe këngëtari elbasanas që përfaqëson Italinë, Ermal Meta.
