Këshilli i qarkut Fier ka bërë një ftesë për ofertë në Agjencinë e Prokurimit Publik, ose ndryshe ka shpallur një tender me objekt “Shërbimi i zëdhënësit të shtypit për nevoja të Këshillit të Qarkut Fier për periudhën prill-dhjetor 2018.
Operatori ekonomik duhet të paraqes këto dokumenta:
-I regjistruar në regjistrat profesional ose tregtar të shtetit
-Kopje e ekstraktit të subjektit nga QKR
-Vërtetim nga zyra tatimore për shlyerjen e detyrimeve fiskale dhe sigurimeve shoqërore
-Vërtetim për shlyerjen e detyrimeve pranë OSHEE për 6 mujorin e fundit
-Vërtetim nga Bashkia Fier për pagesën e taksave
-Referencë Bankare, me numër llogarie
-Licencë për ushtrim aktiviteti
-Fondi limit prill- dhjetor 2018 është 268 101 lekë pa TVSH
Por si ka mundësi që një zëdhënës për shtyp kërkohet përmes një procedure të hapur tenderimi, për Qarkun Fier?
BOOM pyeti kryetarin e Këshillit të Qarkut Fier, Vangjel Ndreka, lidhur me këtë çështje. Ai sqaron se sanitaren, rojen dhe zëdhënësin për shtyp nga viti 2015, kohë kur u miratua reforma territoriale, i zgjedhin me tender si çdo shërbim tjetër, sepse nuk kanë mundësi ta kenë pjesë të organigramës për shkak të numrit të kufizuar të organikës.
Vangjel Ndreka: Qarku i Fierit në organikë ka 10 punonjës dhe 3 të zgjedhur, pra 13 veta.Përsa i përket tre sektorëve të tjerë që janë sanitarja, roja i institucionit dhe zëdhënësi për shtyp këto bëhen me tenderim. Kemi bërë tenderimin për sanitare, kemi bërë tenderimin për ruajtjen e objektit, kemi bërë dhe tenderimin për zëdhënës shtypi. Kemi përcaktuar të gjitha kriteret sipas vendimit të qeverisë që ka ardhur i ndryshuar gjatë vitit 2015. Është hera e tretë që e hedhim në tenderim dhe nuk kemi pasur ofertues. Para reformës territoriale, qarku ka pasur një aktivitet tjetër më të zgjeruar, kemi pasur 65 veta dhe brenda këtij numri kemi pasur dhe zëdhënës për shtyp me vendim të këshillit të qarkut dhe lidhej kontratë direkt dhe paguhej nga ne.
Gazetarja: Po nëse edhe këtë herë që është hera e fundit që ju hapni procedurën për këtë tender, nuk do keni oferta, institucioni do të mbesë pa zëdhënës?
Vangjel Ndreka: Do të shikojmë çfarë hapësirash ligjore kemi.
Gazetarja: Po zëdhënës me qira parashikohet?
Vangjel Ndreka: Me qira nuk mund të themi, por do të ketë media që do ta marrin përsipër besoj vullnetarisht për të pasqyruar gjithë aktivitetin e qarkut. Mbase ka dhe pak problem aty çështja e fondit, por ne kaq e kemi mundësinë.
Gazetarja: Kush mund të konkurojë në këtë tender?
Vangjel Ndreka: Nuk mundesh ti si gazetare përshembull të hysh,vetëm po të jesh e licensuar dhe e regjistruar në QKR e në taksa, që do të thotë janë radio-televizionet ato që mund të marrin pjesë.
Si për ironi, ngjitur me Këshillin e Qarkut Fier, është zyra e unionit të gazetarëve të qarkut Fier. BOOM shkoi të pyesë tek këto zyra nëse janë dakord ata që profesioni i gazetarit dhe pozicioni i tij të zgjidhet në të njëjtën mënyrë si sanitarja dhe roja, por zyrat e unionit të gazetarëve dega Fier ishin të mbyllura.
